Jumat, 29 Mei 2009

NYALAMI INDAI KANCA

NYALAMI INDAI KANCA

Assalamu’alaikum
Salam Pembuka Cawa
Mahhaf Pai Di Sai Makkung
Sanak Bulajakh Cawa

Mati Betik Bekhanda
Sassaini Kuta Jarau
Api Kabakh Cekhita
Kalau Nengan Sai Helau

Najin Jukukna Liyoh
Ti Semprot Laju Mati
Najin Hentakha Jaoh
Kidang Khedik Di Hati

Sanak Medoh Sekula
Cakak Purnama Liwa
Najin Khalang Putungga
Angon Mak Kiwat Lupa

Angon Mak Kiwat Lupa
Jama Puakhi Sunyinni
Khik Kantik Indai Kanca
Mukhanai Khik Mulini

Bangikna Gulai Tuba
Pekhos Sekala Mummi
Angon Dang Ki Nitanya
Mak Khubah Sampai Nanti

Duit Sangon Beguna
Pakai Kham Bubelanja
Segala Ni Bekhita
Selehotan Dang Lupa

Selehotan Dang Lupa
Dalih Bagi Cekhita
Liwat Dunia Maya
Nyalami Indai Kanca

Nyalami Indai Kanca
Puakhi Ku Sunyinni
Masyarakat Di Liwa
Belalau Sai Khususni

Belalau Pai Khususni
Sekhukkuk Khanno Lagi
Kalau Munyayan Sunyinni
Du’a Jama Ilahi

Du’a Mak Pandai Bela
Jama Tuhan Sai Kuasa
Kalau Kham Dapok Tungga
Bugukhau Lalang Waya

Bugukhau Lalang Waya
Bubagi Di Cekhita
Kipak Makung Diganta
Kalau Tungga Kak Buka

Kalau Tungga Kak Buka
Dalih Noton Sakura
Ingok Budaya Saka
Lestakhi Ko Dang Lupa

Lestakhi Ko Dang Lupa
Adat Budaya Saka
Peninggalan Ni Sai Tuha
Penerus Ni Kham Ganta

Penerus Ni Kham Ganta
Sanak Sai Ngukha-Ngukha
Khanno Wi Indai Kanca
Dang Haga Sampai Lupa

Dang Haga Sampai Lupa
Budaya Khik Seni Ni
Cukuppai Hantak Ija
Mahhap Ki Wat Salah Ni

Mahhap Ki Wat Salah Ni
Hakhapan Sekendua
Keritik Khik Saran Ni
Ngehakhap Dang Ki Lupa

Ngehakhap Dang Ki Lupa
Jama Puakhi Sunyinni
Kapan Kak Wat Waktuna
Kanah Ti Sambung Lagi.

Tidak ada komentar: